ЭЭУ 190 КОНВЕНЦИЯСЫ ЖАНА ФОРМАЛДУУ ЭМЕС ИШ МЕНЕН КАМСЫЗ КЫЛУУ БОЮНЧА СЕМИНАР ЖАНА КЫЗМАТТЫН ЖАРЫМ ЖЫЛДЫК ИШИНИН ЖЫЙЫНТЫКТАРЫНЫН ПРЕЗЕНТАЦИЯСЫ.

2024-жылдын 11-12-июль күндөрү Кыргызстандагы Тилектеш Борборунун колдоосу менен Кыргыз Республикасынын Эмгек, социалдык камсыздоо жана миграция министрлигине караштуу Эмгек мыйзамдарын контролдоо жана көзөмөлдөө боюнча кызматтын кызматкерлери үчүн Эмгек Министрлигинин кызматкерлеринин катышуусу менен эки күндүк тренинг болуп өттү. Тренингдин темасы формалдуу эмес жумуштуулуктан формалдуу ишке өтүү маселелерине, ЭЭУ 190 конвенциясына, ошондой эле эмгекти жана саламаттыкты коргоо маселелерине арналды. Семинар тажрыйба жана билим алмашуу үчүн уникалдуу аянтчаны түзгөн бардык инспекторлорду чогултту. Катышуучулар программа менен таанышышты, тобокелдиктерди аныкташты жана аларды минималдаштыруу жолдорун карап чыгышты. Мындан тышкары, эмгек чөйрөсүндөгү зомбулукту жана куугунтуктоону жоюу жөнүндө Эл аралык эмгек уюмунун 190-конвенциясы боюнча окутуу семинарлары өткөрүлдү, бул катышуучуларга эмгек укуктарынын эл аралык стандарттары жаатындагы өз билимдерин тереңдетүүгө жана аларды улуттук мыйзамдарга киргизүүгө мүмкүндүк берди. Катышуучулар жумуш ордунда зомбулук жана куугунтуктоо факторлорун аныктаган топтордо иштөөгө өзгөчө көңүл бурулду. Активдүү талкуулардын жүрүшүндө бул көрүнүштөрдүн алдын алуу жана ага каршы күрөшүү боюнча сунуштар иштелип чыкты. Мындан тышкары, семинарда Кызматтын жана Тилектеш Борборунун биргелешкен ишинин жыйынтыктары тартууланды. Берилген маалыматтарга ылайык, Кызматтын эл арасында көрүнүктүүлүгү кыйла жогорулап, натыйжада жарандардын кайрылуулары көбөйдү. Ошондой эле эмгекти коргоо жана эл аралык стандарттар маселелери боюнча инспекциянын кызматкерлеринин потенциалы өстү. Бул тренинг Кыргызстанда эмгек шарттарын жакшыртуу жана эмгек укуктарын коргоо деңгээлин жогорулатуу жолундагы маанилүү кадам болуп калды. Чогултулган рекомендациялар жана иштин натыйжалары эмгек мыйзамдарын жана аны аткаруу практикасын андан ары өркүндөтүү үчүн колдонулат.