Жалал-Абад шаарында “Өспүрүм түн” аталышындагы рейд өткөрүлдү.

Кызматтын Түштүк региону боюнча региондор аралык башкармалыгынын улук инспектору тарабынан 2025-жылдын 10-февралында саат 22:00дөн 24:00гө чейин Жалал-Абад шаардык Эмгек, социалдык камсыздоо жана миграция башкармалыгынын 2025-жылдын 05-февралынан 12-февралына чейин №63-б сандуу буйругунун негизинде “Өспүрүм түн” аталышындагы рейд өткөрүлдү. Бул рейддин негизги максаты — жашы жете элек өспүрүмдөрдүн эмгегин мыйзамсыз пайдаланууга жана оор эмгек түрлөрүнө тартылышына бөгөт коюу. Аталган иш-чара Жалал-Абад шаардык Эмгек, социалдык камсыздоо жана миграция башкармалыгынын балдарды коргоо бөлүмү жана Жалал-Абад шаардык ички иштер бөлүмүнүн кызматкерлери менен биргеликте уюштурулду. Рейд учурунда шаар аймагында жайгашкан түнкү компьютердик оюн клубдары, тамактануучу жайлар, соода түйүндөрү, эс алуу бактары жана шаардын көчөлөрү текшерүүгө алынды. Кызматтын инспектору жаш өспүрүмдөргө, иш берүүчүлөргө жана ата-энелерге мыйзам чегинде эмгек мыйзамдарын сактоо боюнча түшүндүрүү иштерин жүргүзүп, тиешелүү актылар түзүлдү. Жыйынтыгы боюнча Жалал-Абад шаарынын прокуратурасына маалымат берилди.